Trike driver na inarkila ng 2 bebot, inutas

SANTIAGO CITY, Isabela, Philippines — Nagsasagawa ng imbestigasyon ang pulisya kaugnay sa pagkamatay ng isang tricycle driver na inarkila ng dalawang babae matapos matagpuan ang kanyang katawan sa bahagi ng Barangay Osmeña sa bayan ng Cordon, sa lalawigang ito nitong Lunes.

Kinilala ng Cordon Police ang biktima na si Roberto Dela Cruz, 55, residente ng Barangay Plaridel, Santiago City.

Base sa imbestigasyon ng mga tauhan ni P/Maj. Fernando Mallillin, hepe ng Cordon Police Station, pasado alas-4:00 ng madaling-araw nitong Lunes nang arkilahin ng dalawang hindi kilalang babae ang nasabing driver at traysikel nito patungo sa bayan ng Cordon hanggang sa hindi na nakabalik ang huli sa kanilang TODA.

Dakong alas-7:00 ng umaga na nang matagpuan ang bangkay ng biktima malapit sa kalsada na may tatlong tama ng mga saksak sa iba’t ibang bahagi ng kanyang katawan.

Nakikipag-ugnayan na ang mga imbestigador sa mga posibleng may kuha ng CCTV sa dinaanan ng traysikel mula sa kanilang TODA hanggang sa bayan ng Cordon.