Permanenteng evacuation centers ng mga bakwit sa Albay, hirit

Dahil sa pagputok ng Mt. Mayon

MALILIPOT, Albay, Philippines — Nanawagan kahapon sa pamahalaan ang ilang lokal na pamahalaan sa iba’t ibang bayan sa Albay na apektado sa pag-aalboroto ng Bulkang Mayon na mapatayuan sila ng permanenteng evacuation centers.

Ang panawagan ay isinagawa ni Mayor Cenon Volante ng bayan ng Mali­lipot sa ginawang “Tarabangan (tulong) Caravan” sa San Jose Elementary School Evacuation Center ng Ako Bicol Partylist kung saan nabiyayaan ang mga evacuees o bakwit ng libreng medical at dental check-up, libreng gupit, masahe at iba.

Ayon kay Volante, mahalaga ang pagkakaroon ng permanenteng evacua­tion center sa kanilang bayan na magagamit hindi lang sa panahong nag-aalboroto ang Mt. Mayon kundi maging sa iba pang uri ng kalamidad.

Kapag may permanen­teng evacuation center, hindi na rin aniya maaapektuhan ang mga batang mag-aaral na kadalasang ginagamit ang kanilang mga paaralan at classrooms sa tuwing may lumilikas bunsod ng kalamidad at pagputok ng bulkan.

Ayon kay Cong. Raul Angelo Bongalon, vice-chairman ng house committee on budget and appropriations, siya at ang chairman ng komite na si Cong. Elizaldy Co ay may inihahanda nang budget hinggil dito.

Maliban dito, may na­ka­binbing aniyang batas sa Senado na aprubado na sa ikatlo at pinal na pagbasa para sa pagtatayo ng mandatory eva­cuation center sa lahat ng bayan at lungsod sa buong bansa.

Kailangan lang uma­nong maghanap ng lokal na pamahalaan ng lupa na titirikan ng gusali na gagawing permanenteng evacuation center ng bayan.