Claimant ng P3.7 milyong Kush marijuana, timbog

MANILA, Philippines — Naaresto ng mga tauhan ng Bureau of Customs, katuwang ang Philippine Drug Enforcement Agency (PDEA) ang claimant ng shipment na naglalaman ng P3.7 milyong halaga ng Kush marijuana sa Subic Bay Freeport Zone sa Pampanga.

Unang nadiskubre ang iligal na droga noong Pebrero 19 nang isama ang kontrabando sa package na nanggaling sa Quebec, Canada na idineklarang “window curtains, cotton.”

Idinaan ang shipment sa K9 sniffing at x-ray scanning at saka nagsagawa ng physical examination dahil sa kahina-hinalang impormasyon na nakalap at tumambad ang limang pakete ng pinatuyong dahon at tangkay ng marijuana na aabot sa 2,336 gramo.

Nitong Pebrero 20, nagkasa ang mga tauhan ng Port of Clark, Port of Subic at PDEA ng controlled delivery operation sa consignee sa Subic Bay Freeport Zone, na nagresulta sa pagkakadakip ng claimant nito na hindi muna pinangalanan ng mga otoridad.

Sinampahan na ng kasong paglabag sa RA 9165 o Comprehensive Dangerous Drugs Act of 2002 ang suspek.

Nangako naman si Port of Clark Collector John Simon na magpapatupad pa ng mas mahigpit na panuntunan para malabanan ang pagpasok ng mga kontrabando sa bansa at mapalakas ang border protection nila.