Drug suspect pumalag sa aresto, parak pinagsasaksak

BAAO, Camarines Sur, Philippines — Sugatang isinugod sa pagamutan ang isang pulis matapos pagsasaksakin ng hinuhuling drug suspect sa inilatag na buy-bust operation sa Zone Tipolo, Brgy. Agdangan, Baao, Camarines Sur kamakalawa ng madaling araw.

Patuloy na nilalapatan ng lunas dahil sa tatlong tama ng saksak sa tiyan ang biktimang si Cpl. Roman Batacan, kasapi ng Baao Municipal Police Station.

Sinampahan na ng patung-patong na kaso ang nanaksak na drug suspect na si Nico Briones Miraña, 18-anyos, binata, residente ng Brgy.La Anunciacion, Iriga City at ang kasama nito sa pagtutulak na si Dennis Babol Monge, 33-anyos, residente ng Zone-7, Brgy.Agdangan, Baao.

Sa ulat, dakong alas-12:35 ng madaling araw, inilatag ng mga kasapi ng 2nd Provincial Mobile Force Company, Camarines Sur Police Provincial Office at Baao Police ang buy-bust operation laban sa mga suspek.

Nang iabot ang biniling droga sa poseur buyer ay nagsilabasan na ang mga operatiba kasama si Cpl. Batacan para arestuhin ang dalawang suspek.

Gayunman, pumalag si Miraña na agad bumunot ng icepick at tatlong beses na inundayan ng saksak sa tiyan si Batacan.

Mabilis na isinugod ang sugatang pulis ng kanyang mga kasamahan sa Sta. Maria Josefa Hospital habang nabawi sa dalawang suspek ang apat na sachet ng shabu, mga drug paraphernalia at ang ice pick na ginamit sa pananaksak sa nasabing pulis.