'Jeepcycle' sa Laguna agaw eksena, ibinebenta sa halagang P80k-P120k
MANILA, Philippines — Hindi lang mga karakter sa "Dragon Ball" gaya nina Goku at Vegeta ang pwedeng mag-fusion — ang isang welding shop kasi sa Cabuyao, Laguna gumagawa at nagbebenta na ngayon ng mga jeepney-tricycle hybrid.
Ayon kay Erik Mahinay ng 5E Welding Shop, taong 2019 pa nang una niyang maisip na gawin ang disenyo. Kaso, nitong nakaraang taon na lang daw nila sinimulang gawin ng kanyang mga kapatid.
"Naisipan po namin 'yan dahil sobrang hina po ng kita namin sa pagiging welder. Walang benta sa mga tricycle dahil [COVID-19] pandemic nga," sabi niya sa panayam ng News5, Huwebes.
"Noong gumawa kami ng isa at in-upload namin sa Facebook, doon po [namin nalaman] na marami palang nagkakagusto sa ganoong design kaya hanggang ngayon tuloy-tuloy na siya."
#FrontlinePilipinas | Jeep na tricycle o tricycle na jeep?
— News5 (@News5PH) November 24, 2022
Ito ang kakaibang paandar sa Cabuyao, Laguna. #News5 | via @mongualvez pic.twitter.com/B3p890AMDK
Inaabot ng hanggang 15 araw ang pagbuo nila sa mga jeepcycle, at siyang nagkakahalaga ng P85,000 hanggang P120,000 kada unit.
Kaya daw ng naturang sasakyan magdala nang hanggang anim hanggang pitong katao, kasama na ang tsuper. Ang matindi pa, pwede rin itong lagyan ng gamit sa bubong (top load) habang nagsisilbi ring compartment ang hood. Wala kasi ang makina roon.
"Nagandahan po talaga ako sa yari ng kanilang jeepcycle. Tapos napakaganda pong sasakyan pamalengke, at lalung-lalo na kapag papunta sa kapitbahay kapag magmarites ka," wika ng overseas Filipino worker na si Arthur Gamo mula Italy, na bumili nito para sa pamilya sa Batangas.
"Maalwan sila [pamilya ko]. Pakiramdam nila napakaluwag sa loob. Hindi gaano siya matagtag ['di gaya ng] tricycle."
Sa hiwalay na panayam ng The STAR kay Mahinay, sinimulan nila itong gawin noong nagsimula ang modernisasyon ng mga jeep, bagay na kanilang ikinalungkot lalo na't parte na raw ng kulturang Pilipino ang tradisyunal na "Hari ng Kalsada."
Samantala, sinimulan na rin ng magkakapatid na Mahinay ang paggawa ng "mini version" ng jeep, bagay na kayang magsakay ng waluhang pasahero. Nagkakahalaga naman ito ng P250,00.
Dagdag pa nila, maliit ang gastos sa maintenance ng sasakyan lalo na't makina lang ng motorsiklo ang ginagamit.
"Suportahan natin 'yung gawang Pilipino dahil kaya natin gawin 'yung kaya ng ibang bansa," sabi pa ni Erik. — may mga ulat mula sa News5
- Latest
