4 coastal areas sa Visayas at Mindanao, may red tide
MANILA, Philippines — Iniulat ng Bureau of Fisheries and Aquatic Resources (BFAR) na nagpositibo sa paralytic shellfish poison (PSP) o toxic red tide ang apat na coastal areas sa Visayas at Mindanao.
Batay sa shellfish bulletin na may petsang Setyembre 2, sinabi ng BFAR na kabilang sa mga naturang lugar ay ang Matarinao Bay sa Eastern Samar; coastal waters ng Dauis at Tagbilaran City sa Bohol, Dumanquillas Bay sa Zamboanga del Sur, at Lianga Bay sa Surigao del Sur.
Kaugnay nito, pinaalalahanan ng BFAR ang publiko na lahat ng uri ng shellfish at acetes, o alamang, na nakokolekta mula sa naturang mga lugar ay hindi ligtas na kainin.
Sinabi rin ng ahensiya na ang iba pang seafood o lamang-dagat na nakokolekta sa mga naturang lugar ay ligtas naman sa human consumption kabilang dito ang isda, pusit, hipon at mga alimango.
Kailangan lamang anilang tiyakin na sariwa ang mga ito, nalinis na mabuti at natanggalan ng hasang bago lutuin at kainin.
“Fish, squids, shrimps, and crabs are safe for human consumption provided that they are fresh and washed thoroughly, and internal organs such as gills and intestines are removed before cooking,” anang BFAR.
- Latest
