Babaeng hubad, natagpuang patay sa Baguio
![Babaeng hubad, natagpuang patay sa Baguio](https://media.philstar.com/photos/2022/08/30/aaa2021-05-0123-28-022021-10-0923-57-092021-10-1200-00-29_2022-08-30_23-04-55.jpg)
Nakatali ang kamay at leeg
BAGUIO CITY, Philippines — Nagsasagawa ng masusing imbestigasyon ang pulisya matapos na isang babae ang natagpuang patay at hinihinalang biktima ng panggagahasa sa Barangay Tabora, dito kahapon ng umaga.
Ayon sa Baguio Police, nakatanggap sila ng tawag bandang alas- 6:40 ng umaga kaugnay sa pagkakadiskubre sa katawan ng isang babae na nakalugmok sa loob ng compound ng Rodrigo Magsino.
Ang biktima na hindi pa pinangalanan ng mga awtoridad ay walang pang-itaas at pang-ibabang damit nang matagpuan habang ang kanyang kamay at bibig ay natatalian ng tape habang nakatali rin ng belt ang kanyang leeg.
Sinabi ni Baguio City Police information officer Lt. Angeline Dongpaen na nagsasagawa pa ng follow up investigation ang pulisya sa insidente.
Inaantay rin aniya ang pamilya ng biktima mula sa Pampanga na dumating sa lungsod para sa isasagawang autopsy examination sa biktima upang matukoy ang sanhi ng pagkamatay nito at kung hinalay ng hindi kilalang salarin.
- Latest