Paslit patay sa sunog sa nilarong posporo
MANILA, Philippines — Isang 4-anyos na batang babae ang namatay sa sunog na sumiklab kahapon ng umaga sa Brgy. Basaka, Lapu Lapu City.
Batay sa imbestigasyon, naganap ang sunog dakong alas-9 ng umaga sa bahay ng biktima na si Candice Pailden ng Sitio Cadurong Suba Masulog, Barangay Basak, Lapu Lapu City.
Ayon sa report ng Lapu-Lapu City Fire District, nakita ng ina ng biktima na si Malou na hawak ng anak na paslit ang isang posporo.
Gayunman, inamin ni Malou na nakatulog siya at nagising na lamang sa init ng paligid at nakita niyang nagliliyab na ang kanilang bahay.
Dala ang pagkakataranta at takot, agad na binitbit ni Malou ang isa pa niyang anak na isang sanggol at naiwan sa nasusunog na bahay si Candice. Tinangka pa niyang balikan ang anak para iligtas pero lumaki pa lalo ang apoy hanggang sa tuluyang lamunin ang kanilang tahanan at nadamay ang apat pang bahay na katabi nito.
Hinala ng mga awtoridad, napaglaruan ng bata ang posporo hanggang sa madamay ang higaan na nagresulta ng mabilis na pagsiklab ng apoy.
- Latest
