Chinese trader timbog sa rape sa empleyado ng misis
BAYOMBONG, Nueva Vizcaya, Philippines — Kulungan ang bagsak ng isang negosyanteng Chinese national matapos ireklamo sa panggagahasa sa isang 19-anyos na dalaga na empleyado ng kanyang misis sa Sitio Pulloc, Barangay Roxas ng lalawigang ito, ayon sa ulat ng pulisya kahapon.
Kinilala ni P/Pat. Caroline Dascil ng Nueva Vizcaya Police Provincial Office ang nadakip na suspek na si Shi Zi Li, 35, at residente ng nasabing lugar.
Sa ulat ng Solano Police, unang tinawagan umano ng suspek ang biktima na itinago sa pangalang “Wandang” at nakipagkasundo na magkita sa isang fastfood sa nasabing bayan nitong May 17.
Inalok din umano ng suspek ang biktima na sumakay sa kanyang sasakyan subalit may ipinaamoy umano ang Chinese sa biktima hanggang mahilo at tuluyang madala sa isang drive-inn hotel. Nagpamasahe pa umano ang suspek bago nito umpisahang gahasain.
Binantaan din ng suspek na huwag magsusumbong sa sinuman kasabay ng alok na P1,500 na sapilitang tinanggap umano ng biktima.
Sa kabila ng takot, nagpasya ang biktima na lumapit sa pulisya na nagresulta sa pagkakadakip ng suspek.
- Latest
