P5.3 milyong Ecstasy party drugs nasamsam
MABALACAT, Pampanga - Umiskor ang mga operatiba ng pulisya kasunod ng pagkakasamsam ng P5.3-M halaga ng ecstasy party drugs habang arestado naman ang isang hinihinalang drug trafficker sa isinagawang operasyon sa bayang ito, kamakalawa.
Arestado naman sa operasyon si Agatha Lavadia Palen sa operasyon sa ikalawang palapag ng Mabalacat City Post Office sa Mabalacat Market, Brgy. San Francisco ng lungsod.
Ang operasyon ay isinagawa ng pinagsanib na elemento ng PNP, Philippine Drug Enforcement Agency (PDEA), Bureau of Customs at Philpost Inspectorate Service matapos na makatanggap ng impormasyon na ipadaraan sa parcel ang nasabing mga ecstasy party drugs.
Nakumpiska mula kay Palen ang 3, 100 piraso ng ecstasy na may katumbas na halagang P5,279,000.00, isang unit ng Iphone 7 cellular phone, isang Bureau of Internal Revenue ID, isang Philpost Official Acknowledgement Receipt, isang Registry Notice, isang Authorization letter, isang zerox copy ng ID ni Zhyrelle Ancheta, isang parcel delivery notice at isang signature record mula sa courier service.
Ayon kay PNP Officer–in-Charge P/Lt Gen. Guillermo Eleazar ang pagkakakumpiska sa nasabing halaga ng droga ay bahagi ng pinaigting na anti-drug campaign at pagtutulungan ng mga law enforcement agencies.
- Latest
