Kuya binaril sa ulo ng utol, utas
TIAONG, Quezon, Philippines — Sabog ang ulo at namatay noon din ang isang magsasaka makaraang barilin ng nakababatang kapatid na sikyu kamakalawa ng gabi sa Sitio Adelina, Brgy. Lagalag ng bayang ito.
Sa ulat ni P/Lt. Col. Dennis De Leon, Tiaong Police chief, nakilala ang biktima na si Benerando Capina, 52, may asawa habang kinasuhan na ng pagpatay ang tumakas na kapatid na si Roderick Capina, 50, binata.
Sa ulat, bandang alas-10:30 ng gabi ay nakita ang magkapatid na nag-iinuman hanggang sa magkaroon ng mainitang pagtatalo. Maya-maya ay umuwi sa kanyang bahay ang nakababatang Capina at pagbalik ay armado na ng hindi pa batid na kalibre ng baril saka pinaputukan ang kuya.
Nang duguang bumulagta sa lupa ang kapatid, naglakad lang patakas ang suspek dala ang baril na ginamit sa krimen.
- Latest
