Misis utas, 6 sugatan sa banggaan
STO. DOMINGO, Albay, Philippines — Nagkalasug-lasog ang katawan ng isang 45-anyos na misis habang anim na iba pa ang isinugod sa pagamutan matapos na magbanggaan ang Mitsubishi Adventure at tricycle sa kahabaan ng national highway sa Purok-4,Brgy. San Isidro ng bayang ito kamakalawa ng gabi.
Dead-on-arrival sa Bicol Regional Training and Teaching Hospital sa Legazpi City ang biktimang si Lidelina Fernandez Bisco, may-asawa at residente ng Brgy.Maliktay, San Miguel Island Tabaco City.
Sugatan naman ang mga kasamang sina Cardo Calmada Canabal,residente ng Brgy. Sugcad, Malinao, driver ng tricycle, mga pasaherong sina Andrew Canabal,Vicente Bisco at isang 15-anyos na binatilyo habang kasamang isinugod rin sa pagamutan sina Allan Belisario Cestina, 46, driver ng kabanggaang SUV, residente ng Brgy.Payahan, Malinao,mga pasaherong si Ma.Noemi Cao at isang 14-anyos na dalagita.
Sa ulat, alas-10 ng gabi ay magkasalubong na binabagtas ang kahabaan ng highway ng tricycle na minamaneho ni Canabal at ng Mitsubishi Adventure (EBS-970) na minamaneho naman ni Cestina.
Gayunman, pagdating sa lugar ay nawalan ng kontrol ang tricycle at biglang napunta sa linya ng kasalubong na SUV dahilan para magbanggaan.
- Latest
