Sanggol kinain ng aso

KIDAPAWAN CITY, Philippines — Nagkagutay-gutay ang katawan ng isang sanggol na pinaniniwalang bagong luwal nang makita ng mga residente ang labi nito sa likod ng health center na nasa damuhan ng Sentro ng Barangay Onica sa lungsod na ito, Miyerkules ng gabi.

Ayon kay Kagawad Virgilio Dorado, isang residente ang nakakita matapos na pinagtatakhan nitong pabalik-balik ang mga aso sa lugar pasado alas-6:00 ng gabi.

Nang siyasatin, tumambad sa kanila ang bagong luwal na sanggol na nagkalasug lasog na ang katawan dahil sa kinain na ng mga aso.

Hindi na rin naisalba ang sanggol dahil patay na ng matagpuan.

Malaki ang paniniwala ng opisyal na nasa kanilang barangay lamang ang ina ng bata na nagtapon sa sanggol.

Posible umanong hindi matanggap ng ina ang sinapit nitong pagbubuntis.

Sa ngayon, magsasagawa sila ng pagsisiyasat at documentation sa lahat ng mga buntis sa kanilang barangay upang mabatid kung sino ang ina na suspek dito.

Kasong infanticide ang posibleng kakaharapin ng suspek.