Manager ng coop itinumba!

MANILA,Philippines — Patay ang isang manager ng kooperatiba makaraang pagbabarilin ng ‘di pa nakikila­lang gunman sa Purok 6A, Barangay Poblacion, New Corella, Davao del Norte kamakalawa ng umaga.

Kinilala ang biktima na si Segundino “Yoyoy” Trocio Comonsad, 46-anyos, may asawa at isang administrative manager ng United Laborer’s Multi-purpose Cooperative (ULMPC) at residente ng P-6C, Brgy. Poblacion, nasabing bayan.

Sa inisyal na pagsisiyasat ng pulisya, sakay ng kanyang kulay itim na motorsiklo (1637 YT) ang biktima at binabagtas ang daan papunta sa kanyang trabaho sa Brgy. San Roque subalit pagdating nito sa nasabing lugar ay pinagbabaril siya ng isang ‘di kilalang suspek dakong alas-6:00 ng umaga.

Nagtamo ang biktima ng maraming tama ng bala sa iba’t ibang bahagi ng katawan habang pasimple lamang na nag­lakad ang suspek patakas patungo sa ‘di malamang direksiyon. Naisugod pa ang biktima sa Davao Regional Medical Center pero ‘di na umabot pang buhay.

Narekober sa crime scene ang tatlong basyo ng kalibre .45 pistol at ang motorsiklo ng biktima.