4-anyos patay sa 2-feet kiddie pool

TUGUEGARAO CITY, Cagayan, Phillipines — Nasawi ang isang 4-anyos na batang babae matapos malunod sa kiddie pool ng isang resort habang abala sa kasiyahan ang kanyang ama sa mga kasamahan sa trabaho sa Brgy. Caggay ng lungsod na ito noong Sabado.

Sa report kay City Chief of Police Lt. Colonel George Cablarda, isinama ng kanyang ama ang batang si Kasandra Kate Caronan, residente ng Ugac Norte, Tuguegarao City sa pagtitipon at night swimming ng mga katrabaho nito sa Cagayan Valley Medical Center sa Chateau Leonor Resort sa Brgy. Caggay at iniwan niya ang anak sa may 2-feet na lalim na pool na may dalawa ring paslit na nagtatampisaw dakong alas-7:45 ng umaga.

Ayon sa report, lingid sa kaalaman ng ama na natagpuan na lamang ng mga tao sa resort na wala nang ulirat na nakahilata ang anak sa pool makalipas ang 15 minuto. Agad na binigyan ng CPR ng mga sumaklolo ang biktima saka isinugod sa sa Roland Guzman Medical Center subalit idineklara ang bata na dead-on-arrival.

Sinisiyasat ng mga awtoridad ang mga lifeguard sa resort kung bakit hindi nila napuna ang pagkalunod ng bata habang pinag-aaralan ang isasampang kaso laban sa resort dahil sa kapabayaan.