2 dalagita pisak sa trak
SANTIAGO CITY, Isabela, Philippines –Dalawang dalagita ang napisak habang sugatan ang isa pa matapos na bumangga ang sinasakyan nilang motorsiklo sa isang nakahimpil na van saka sila nagulungan ng paparating na truck sa kahabaan ng national highway sa Bambang, Nueva Vizcaya, kahapon ng madaling araw.
Kinilala ng Bambang Police ang mga nasawi na sina Joanna Rose Sagun, 13, at Jamaica Adelia Hadjomar, 14, pawang ng Brgy. Aliaga, Bambang habang kritikal sa ospital ang kanilang kasamang si Edgar Fragata, 21, ng Nagtipunan, Quirino.
Ayon kay P/Capt. Julia Mejia, officer-in-charge ng Bambang Police, nag-overtake umano ang motorsiklo na minamaneho ni Fragata at angkas ang dalawang dalagita sa kanang bahagi ng highway sa Brgy. Almaguer North sanhi para sumalpok sila sa isang nakaparadang van dakong ala-1:00 ng madaling araw. Dahil dito, tumilapon ang mga biktima sa gitna ng kalsada at eksakto namang paparating ang rumaragasang trak kaya sila nasagasaan.
Durog ang mga biktima habang tumakas ang trak na minamaneho ng ‘di kilalang driver.
Sa teyorya ng pulisya, isang malaking trak ang sumagasa sa mga biktima matapos magkalasug-lasog at humiwalay pa ang ilang parte ng kanilang katawan na nagkalat sa kalsada.
- Latest
