80-anyos lola nakalawit ng side mirror, dedo

CAVITE , Philippines — Patay agad matapos na makalawit ng side mirror ng isang jeepney ang isang 80-anyos na lola habang tumatawid sa kahabaan ng Aguinaldo Hi-way, Brgy. Palico 1, Imus City kahapon ng madaling-araw.

Kinilala ng pulisya ang biktima na si Alba Ronquillo, ng 4931 Novaliches, Brgy. Olympian, Makati City habang arestado ang driver ng jeep na si Rodel Dayrit,  39, ng Brgy. San Isidro Labrador, Dasmariñas City, Cavite.

Sa ulat ni P/SSG Margerie Pabiton, alas-5:00 ng madaling araw habang tumatawid ang biktima sa highway nang aksidente siyang sumabit sa side mirror ng isang rumaragasang jeep na minamaneho ni Dayrit.

Dahil dito, bumagsak ang biktima at tumama ang ulo nito sa kalsada at nawalan agad ng ulirat. Agad siyang itinakbo sa pagamutan subalit namatay din sanhi ng internal hemorrhage dahil sa tinamong pinsala sa ulo.

Ayon sa suspek, inakala niyang nakalagpas na sa pagtawid ang biktima at hindi niya namalayang sumabit ang matanda sa kanyang side mirror.