Mister itinumba habang nagpapastol
SANTIAGO CITY, Isabela, Philippines — Patay ang isang mister nang ratratin ng ‘di pa natutukoy na suspek habang nagpapastol ng kanyang alagang kalabaw sa bayan ng San Agustin, sa lalawigang ito, kamakalawa ng hapon.
Nakilala ang biktima na si Dennis dela Cruz, karpintero, may asawa, at residente ng Purok 5, Barangay Salay, ng naturang bayan.
Batay sa inisyal na im-bestigasyon ng pulisya, kasalukuyan noon na kinukuha ng biktima ang kanyang alagang kalabaw malapit sa isang maisan nang sunud-sunod na pinaputukan ng suspek hanggang sa duguang bumulagta.
Agad naman na pinuntahan ng kanyang misis ang biktima na noon ay nasa hindi kalayuan matapos marinig ang mga putok ng baril at dito na nito nakita ang nakahandusay at duguang mister na wala nang buhay.
Patuloy ang masusing imbestigasyon ng mga otoridad sa motibo at kung sino ang nasa likod ng pamamaslang.
- Latest
