6-anyos nalunod sa pool
MANILA, Philippines — Binawian ng buhay ang isang 6-anyos na batang lalaki habang isinasalba sa ospital matapos na malunod habang naliligo sa swimming pool sa isang beach resort sa Brgy Tambler sa General Santos City. Kinilala ang biktima na si Ricardo Butas Jr. residente ng Barangay Lagao ng lungsod kungsaan namatay rin pasado alas-10:00 ng gabi kamakalawa.
Ayon sa ulat, kasama ng biktima ang kanyang lolo at lola ng maligo sa nasabing beach resort kungsaan sa loob ng resort ay may isang pool at doon naligo ang bata. Sa police blotter ng Tambler Police Station, iniulat ng mag-asawang Cerila at Alejandro Lachica Jr. ang nangyaring pagkalunod ng kanilang apo.
Nakita pa umano nila ang bata sa swimming pool at inakala nila na naliligo lamang sa mababang bahagi nito pero nang lingunin nila uli ay nakitang lumulutang na ito. Mabilis na isinugod ang bata sa ospital pero binawian din ng buhay habang ginagamot.
- Latest
