22 estudyante nalason sa siomai

TUGUEGARAO CITY, Cagayan , Philippines  —  Umabot sa 22 estudyante ng Cauayan City National High School ang isinugod sa hospital matapos umanong malason sa kinaing siomai sa Kantina ng kanilang paaralan sa Cauayan City, Isabela noong Martes. ?Si Liezle Almuete, 12, na isa sa mga naisugod sa Cauayan City District Hospital ang nagsabing siya at lima sa kanyang mga ka­klase ang nakaramdam ng pagkahilo, pananakit ng katawan at pagsusuka matapos kumain ng siomai na paninda ng isang konsesiyonaryo ng paaralan sa kanilang break time dakong alas-10:00 ng umaga.

?Nabatid na ang ibang mga mag-aaral na naisugod sa iba’t-ibang pagamutan sa lungsod ang nagsabing bumaligtad ang kanilang sikmura sa pagkain ng siomai na pinaniniwalaang panis na.? Sinisiyasat ng pulisya ang maaaring pa­nanagutan ng mga opisyal ng paaralan sa pinaniniwalaang kaso ng food poisoning.