Parak dedo sa tandem

SANTIAGO CITY, Isabela, Philippines — Namatay noon din ang isang miyembro ng Philippine National Police (PNP) matapos itong pagbabarilin ng di natukoy na riding-in-tandem, sa bayan ng Alcala, Cagayan, kamakalawa ng gabi. Kinilala ang nasawing biktima na si SPO3 Romeo Bueno, 46-anyos, nakatalaga sa Alcala police office at residente ng Barangay Tupang sa nabanggit na bayan. Batay sa ulat ni SPO2 Banedicto Bilibol, imbestigador ng Alcala PNP, dakong alas-7:15 ng gabi nang pagbabarilin si Bueno ng dalawang suspek sa kahabaan ng national highway sa nasasakupan ng Barangay Tupang.  Papasok sana umano ang biktima sa Alcala PNP sakay sa kanyang motorsiklo nang sundan ng mga riding assasins at ratratin sa tapat ng isang gasolinahan sa nasabing lugar. Apat na tama ng bala mula sa isang cal.45 ang tinamo ng biktima na siyang dahilan ng kanyang agarang pagkasawi. Patuloy ang imbetigasyon sa naturang kaso.