Rookie cop itinumba ng tandem

COTABATO CITY, Maguindanao , Philippines  - Maagang sinalubong ni kamatayan ang isang bagitong pulis makaraang pagbabarilin ng riding-in-tandem assassins sa bisinidad ng Sitio Lamsan, Barangay Simuay sa bayan ng Sultan Kudarat, Maguindanao kahapon. Kinilala ni P/Insp. Razul Pandulo, spokesperson ng Maguindanao police ang biktima na si PO2 Jonald Clarino, 24, nakatalaga sa 15th RPSB ng PRO-ARMM. Sa inisyal na ulat ng pulisya, nakamotorsiklo ang biktima nang dikitan at ratratin ng riding-in-tandem gunmen gamit ang cal.45 pistol. Naisugod naman sa ospital ang biktima subalit idineklarang patay. Nagawa pang paputukan ng mga pulis na rumesponde na may ilang metro ang layo sa pinangyarihan ng pamamaril subalit mabilis na nakalayo ang gunmen.