Doktor at sekyu, nilikida sa klinika
COTABATO CITY, Maguindanao , Philippines - Bumulagta ang 37-anyos na opthalmologist kasama ang kanyang closed-in body guard makaraang barilin ng hindi kilalang lalaki sa loob mismo ng kanyang klinika sa Cotabato Doctor’s Clinic sa Sinsuat Avenue, Cotabato City, Maguindanao kahapon ng umaga.
Kinilala ni P/Senior Insp. Alexander de Pedro, station commander ng police station 2 ang mga biktimang sina Dr. Shajid ‘Jaja’ Monera Sinolinding, may asawa; at Mohammed Ismael, 33, kapwa nakatira sa Barangay Poblacion sa bayan ng Kabacan, North Cotabato.
Batay sa ulat ng pulisya, pumasok sa ikalawang palapag ng ospital ang gunman kung saan nagsasagawa ng operasyon si Dr. Sinolinding nang lapitan at pagbabarilin sa ulo kasama ang kanyang body guard.
Nabatid na si Dr. Jaja ay bunsong kapatid ni DOH-ARMM Secretary Dr. Kadil ‘Jojo’ Sinolinding.
Agad namang ililibing ngayong hapon sa Brgy. Kayaga sa bayan ng Kabacan ang biktima batay sa kaugaliang Islam habang patuloy naman ang imbestigasyon.
- Latest
