Trader inutas ng maskarado

QUEZON, Philippines -  Napaslang ang 49-anyos na negosyante matapos itong pagbabarilin ng maskaradong lalaki sa harapan ng kanyang bahay sa Barangay Cawayan, bayan ng Real, Quezon kamakalawa ng gabi. Dalawang bala sa ulo ang tumapos sa buhay ni Dante Romantico, may asawa at residente ng nasabing barangay. Batay sa imbestigasyon ng pulisya, dakong alas-8:15 ng gabi nang iparada ng biktima ang kanyang traysikel sa garahe ng kanilang bahay. Gayunman, hindi pa nakakalayo sa garahe ang biktima ay nilapitan at niratrat ng gunman na naka-itim na jacket at bonnet. Kaagad na tumakas ang gunman lulan ng motorsiklo patungo sa direksyon ng Famy sa Laguna.