Bus vs bike: 1 patay, 2 kritikal

LEGAZPI CITY, Albay, Philippines – Patay ang 18- anyos na lalaki habang kritikal naman ang dalawang iba pa makaraang sumalpok ang kanilang motorsiklo sa pampasaherong bus na papalabas ng pantalan sa panulukan ng Barangay Camcaman at Barangay Caloocan sa bayan ng Matnog, Sorsogon kamakalawa ng gabi. Kinilala ang namatay na si Angelo Madrid habang isinasalba naman ang buhay sa Sorsogon Provincial Hospital sina Danica Verano, 18; at Julius Verano, 17, driver ng motorsiklo, mga nakatira sa Barangay Hidhid sa nasabing bayan. Sa ulat ni Senior Supt.Ronaldo Cabral, provincial director ng Sorsogon PNP Provincial Office, dakong alas-11:30 ng gabi papasok sana sa Matnog Port ang motorsiklo na sinasakyan ng mga biktima nang makasalubong ang CUL Transport Bus (EVT228) na patungong Metro Manila. Nakatakda naman kasuhan ang driver ng bus na si Domingo P. Beriso, 58, ng Barangay Lubas sa Caramoan, Camarines Sur.