7 tinedyer na kinidnap, nasagip
MANILA, Philippines – Pitong tinedyer na kinidnap ng mag-ina na sinasabing notoryus na sindikato ng illegal na aktibidades ang nasagip sa isinagawang rescue operations sa Alaminos City, Pangasinan kamakalawa ng hapon.
Kinilala ang mga biktima na sina Ailyn Opolinto, 14; Sabrina Cabanban, 16; Wennilyn Humilde, 14; Rubilyn Villanueva, 16; mga nakatira sa bayan ng Bani, Pangasinan; Jerome Soriano, 16; Jhomar Ken Radoc, 17; at si Mark Christopher Cerdan, 17.
Arestado naman sa operasyon ang mag-inang suspek na sina Christina Reyes, 46; at Christian Reyes, 22, kapwa nakatira sa Brgy. San Roque, Alaminos City.
Sa ulat ng Pangasinan Police, bandang alas-2 ng hapon ng magsagawa ng rescue operation ang Alaminos City PNP sa Barangay Pogo.
Nabatid na dumulog sa pulisya ang mga magulang na sina Beberly Villanueva at Mary Ann Soriano kaugnay sa pagkawala ng kanilang mga anak simula pa noong Enero 23, 2015.
Nang salakayin ang pinagtataguan sa mga biktima ay nadiskubreng nakakulong sa cabinet ang mga biktimang sina Rubilyn, Jhomar Ken at si Mark Christopher habang ang apat pa ay nakakulong naman sa loob ng silid.
Pinaniniwalaang gagamitin ng mag-ina ang mga biktima sa kanilang modus operandi tulad ng pornographic sa website o cybersex na ang mga kustomer ay dayuhan.
- Latest
