Pulis itinumba ng tandem

BATANGAS, Philippines – Kamatayan ang sumalubong sa 41-anyos na beteranong pulis matapos itong pagbabarilin ng riding-in-tandem assassins sa bayan ng Lemery, Batangas noong Lunes ng umaga. Kinilala ang napatay na si SPO1 Bernard Mendoza Regional Engineering Unit 4-A at nakatira sa Barangay Calayaan sa bayan ng Sta. Teresita, Batangas. Sa police report na nakarating kay P/Senior Supt. Arcadio Ronquillo, Jr. Batangas PNP director, papasok na sa trabaho si SPO1 Mendoza sakay ng motorsiklo nang sundan at ratratin ng tandem pagsapit sa bisinidad ng highway sa Barangay Mahabang Dahilig bandang alas-9:15 ng umaga. Isinugod pa si Mendoza sa Batangas Provincial Hospital pero idineklarang patay. Narekober sa crime scene ang tatlong basyo ng cal. 45 pistol.