Manager hinoldap ng 3 ‘parak’
BULACAN, Philippines – Isang lalaking manager ng kilalang money changer ang hinoldap ng tatlong kalalakihan na nagpakilalang mga pulis at tumangay ng mahigit P.1 milyon cash sa Brgy. Tabang, Guiguinto, Bulacan kahapon.
Kinilala ang biktima na si Joven Siasoco, 49, manager ng JTS money changer at residente ng Brgy. Tibig sa Bulakan, Bulacan.
Pinaghahanap naman ang tatlong suspek na pawang armado matapos tumakas lulan ng Honda Civic na hindi nakuha ang plaka.
Sa report ni SPO2 Santiago Estrella, dakong alas-7:45 ng gabi habang nag-aabang ng sasakyan ang biktima sa isang lugar sa Brgy. Tabang galing ng Manila matapos na ipalit nito ang $6,000 na may katumbas na halagang P250,000 sa isa pang money changer sa Malate nang biglang tumigil sa harapan nito ang sasakyan ng mga suspek na nagpakilalang mga pulis.
Puwersahan umanong ipinasok sa sasakyan. Pumalag ang biktima subalit pinalo siya ng baril ng mga suspek sa ulo.
Habang nasa loob ng sasakyan ang biktima, agad na tinakpan ang mga mata nito at kinulimbat ng mga suspek ang kanyang pera at saka siya inabandona sa isang lugar sa Brgy.Taal sa Bocaue hanggang sa makita siya ng mga barangay tanod na agad na humingi ng tulong sa pulisya.
- Latest
