Katiwala ng mga Leviste, nalunod

BATANGAS, Philippines – Hindi na umabot ng Pasko ang 50-anyos na katiwala ni Antonio Leviste Sr. matapos itong malunod sa kasagsagan ng bagyong Nona sa bayan ng Nasugbu, Batangas noong Martes ng umaga. Kinilala ang biktimang si Fernando Cos, caretaker sa Polo Island na pag-aari ng mga Leviste. Ayon sa report, sakay ng bangka si Fernando kasama ang kanyang nanay at pamangking lalaki mula sa isla patungong Brgy. Balaytigue para kumuha ng inuming tubig nang balyahin ng malakas na alon at may ilang metro na lamang ang layo sa dalampasigan. Nagawa namang makalangoy papuntang pampang si Teresa at ang apo nito habang tinangay naman ng malakas na alon si Fernando hanggang sa ito ay malunod. Narekober naman kinabuksan ang katawan ng biktima kung saan ini-report naman ng kanyang mga kaanak sa himpilan ng pulisya.