Tiyuhin ginulpi ng pamangkin

TUGUEGARAO CITY, Cagayan, Philippines – Nakikipaglaban kay kamatayan ang 54-anyos na opisyal ng Department of the Interior and Local Government (DILG) matapos itong gulpihin ng kanyang pamangking senglot sa Barangay Lapogan, bayan ng Gattaran, Cagayan kamakalawa. ?

Ayon kay PO3 Elmar Ventura, kinailangan pang ilipat sa Cagayan Valley Medical Center ang biktimang si Juanito Tolentino na operations chief ng DILG sa Nueva Viscaya dahil sa maselan nitong kalagayan matapos gulpihin ng suspek na si Ison Tolentino na kanila ring kapitbahay.

Lumalabas sa imbestigasyon na tumangging buksan ng biktima ang kanilang bahay upang pagbentahan ng alak ang lasing nitong pamangkin na nagwawala sa labas ng kanilang bahay dakong alas-8 ng gabi.?

Sa sobrang galit ay pinasok ng suspek ang bahay ng biktima na noo’y nanonood ng teleserye at doon pinagbuhatan ng kamay hanggang mawalan ng ulirat habang tumakas naman ang suspek matapos ang insidente.