Trader dinedo na, ninakawan pa

KABACAN, North Cotabato, Philippines – Patay ang isang negosyante matapos na pagbabarilin ng ‘di kilalang salarin at tinangay pa ang kanyang motorsiklo sa Barangay Kayaga, Kabacan, lalawigang ito kamakalawa ng gabi.

Kinilala ni PSI Ronnie Cordero, hepe ng Kabacan PNP ang biktima na nasawi noon din bunsod ng maraming tama ng bala sa katawan na si Danilo Cadot Angeles, nasa hustong gulang at residente ng Sayre, Carmen, North Cotabato.

Batay sa ulat, dakong alas-6:30 ng gabi habang sakay ang biktima sa kanyang kulay pulang Honda XR 200 (2638) nang bigla na lamang pagbabarilin ng suspek.

Nang makitang nakabulagta ang biktima, mabilis na kinuha at sinakyan ng suspek ang motorsiklo ng biktima at saka pinaharurot patakas.

Hinihinala ng pulisya na “agaw-motorsiklo” ang motibo sa nasabing krimen.