Natuluyan sa ika-4 na pagkakataon… Lola sinilaban ang sarili

TUGUEGARAO CITY, Philippines - Natuluyan sa ikaapat na tangkang pagpapakamatay ang isang 67-anyos na lola nang silaban nito ang kanyang sarili dahil sa hindi makayanang depresyon sa pagkamatay ng kanyang anak sa Sitio Dana, Brgy. Manga, Peñablanca, Cagayan, kamakalawa ng gabi.

Kinilala ni Chief Insp. Jonalyn Tecbobolan, hepe ng PNP Peñablanca ang biktima na si Martina Furigay.

Sa ulat na natanggap nito na nakita na lamang ng mga kapitbahay na nag­liliyab na gumagapang sa lupa si Furigay na nagtamo ng second degree burn sa buong katawan.?

Nabatid na unang nagtangkang maglaslas ng sariling leeg, uminom ng chlorox at maligo ng kumukulong tubig ang biktima na laging naaagapan dahil nagkataon na nandoon ang mga kaanak nito.

Ngunit sa ikaapat na pagkakataon ay wala sa bahay ang mga kaanak kaya’t nagawa nitong magpakamatay.

Ayon sa mister ng biktima na natagpuan niyang said ang kanilang lalagyan ng gasolina na halos anim na litro ang laman na siyang ibinuhos ng asawa at silaban ang sarili.