Rido: 2 utas, kabahayan sinunog

NORTH COTABATO, Philippines - Dalawa-katao ang napatay habang sinunog naman ang maraming bahay makaraang salakayin ng mga armadong grupo ang isang coastal area sa Cotabato City, Maguindanao kahapon ng umaga. Isa sa napatay ay kinilalang si Abubakar Guiamadel, fishpond caretaker habang ang isa ay kasalukuyang bineberipika pa. Sa ulat na nakarating kay P/Senior Supt. Rex Anongos, Cotabato City PNP director, inatake ng mga armadong kalalakihan ang Barangay Kalanganan-2 kung saan pinagsusunog ang mga bahay. Nagsilikas naman ang mga sibilyan sa takot na madamay sa walang habas na pagpapaputok ng grupo ng kalalakihan. Pinaniniwalaang may kaugnayan ang pagsalakay ng grupo ng kalalakihan sa naganap na pananambang at pagkamatay ng lima-katao sa Brgy. Dulangan, bayan ng Datu Odin Sinsuat sa Maguindanao.