Mister nilapa ng 5 asong Belgian Malinois

MANILA, Philippines – Masaklap na kamatayan ang sinapit ng 25-anyos na mister matapos itong lapain ng limang asong Belgian Malinois sa Barangay Camanag Riverside sa Urdaneta City, Pangasinan noong Linggo ng gabi. Nagtamo ng malalalim na sugat mula sa pangil ng limang asong may kakaibang lahi ang biktimang si Lito Abucayan. Sa  naantalang ulat ng Urdaneta City PNP na isinumite sa Camp Crame, naitala ang insidente dakong alas-7 ng gabi habang naglalakad ang biktima nang habulin ito ng limang asong Belgian na sinasabing nakakawala sa bakuran ng isang residente. Nagawang umakyat ng biktima sa mababang puno ng niyog pero dumausdos ito pababa kaya pinagtulungang lapain hanggang sa mapatay ng mga aso. Bagama’t naisugod sa pagamutan ay idineklara ng patay ang biktima habang inaalam ng pulisya ang pananagutan ng may-ari ng mga aso.