Magkaibigan dinedo ng holdaper

PAMPANGA, Philippines – Dalawa-katao ang napatay habang tatlo naman ang nasugatan matapos pagbabarilin ng riding-in-tandem gunmen sa naganap na panibagong holdapan sa kahabaan ng Arayat-Magalang Road sa Barangay Arenas sa bayan ng Arayat, Pampanga noong Lunes ng madaling araw. Base sa police report na nakarating kay P/Supt. Allan Palomo, hepe ng Arayat PNP, kinilala ang mga napatay na sina Jaymar Bulanadi, 23; at Ronnie Lugue, 21. Naisugod naman sa JBL Regional Hospital ang mga sugatang sina Jayvee De Leon, 23; Arjay Mallari, 23; Rizalyn Paguinto, 23, mga nakatira sa Barangay San Agustin sa bayan ng Sta. Ana, Pampanga. Lumilitaw na magkakasama sa traysikel ang mga biktima mula sa Double J Video Bar nang harangin at holdapin ng mga di-kilalang lalaki na lulan ng motorsiklo. Tumangging ibigay ng mga biktima ang kani-kanilang pera kaya nagalit ang mga hodalper saka sila niratrat. Bago tumakas ay pinutukan din ng mga holdaper ang dumaraang SUV na may plakang ABF-8092 na minamaneho ni Roder Millares ng Brgy. San Antonio, bayan ng Cabiao, Nueva Ecija. Narekober sa crime scene ang dalawang basyo ng bala ng cal. 45 pistol.