CAFGU nag-amok: 2 todas, 1 sugatan

North Cotabato, Philippines - Patay ang dalawang Cafgu habang sugatan naman ang isa nang pagbabarilin ng kanilang kasamahan sa kanilang detachment sa Palo 19 Patrol Base sa Tampakan, South Cotabato kamakalawa ng gabi.

Kinilala ang nasawi na sina Mark Anthony Macul, residente ng Barangay San Isidro at Frankly Villoria, residente ng Palo 19, Tampakan habang ginagamot sa ospital ang sugatang si Camelo Declaro.

Agad na tumakas bitbit ang M14 rifle ang suspek na si Anthony Aradaza, residente ng Palo 19 ng nabanggit na bayan.

Inihayag ni Lt. Colonel Ronald Jess Alcudia, commanding officer ng 27th Infantry Battalion ng Philippine Army na pasado alas-9 ng gabi habang masayang nanonood ng telebisyon ang apat nang bigla na lamang namaril ang suspek.

Matapos na mamaril, agad na tumakas ang suspek.

Inaalam pa ang motibo ng nangyaring krimen.