2 Sayyaf utas sa bakbakan

MANILA, Philippines - Dalawang miyembro ng mga bandidong Abu Sayyaf Group (ASG) ang napaslang makaraang makasagupa ang tropa ng Philippine Marines sa magubat  na bahagi ng Patikul, Sulu kamakalawa.Ayon kay Captain Rowena Muyuela, spokesperson ng AFP-Western Mindanao Command, bandang alas-4 ng hapon nang makabakbakan ng mga sundalo ang tinatayang nasa 80 bandido sa Brgy. Danag, Patikul ng lalawigan. Sinabi ni Muyuela na ang mga bandidong nakaengkuwentro ng mga sundalo ay mula sa grupo ni Abu Sayyaf Sub-Commander Hairulah Asbang. Kasalukuyang nagsasagawa ng security operations ang tropang gobyerno nang masabat ang grupo ng mga bandido na nauwi sa sagupaan sa pagitan ng magkabilang panig. Narekober naman mula sa tabi ng bangkay ng mga napaslang na kalaban ang dalawang malalakas na kalibre ng armas. (Joy Cantos)