Magsasaka dedo sa tandem

TUGUEGARAO CITY, Cagayan, Philippines - Hindi na nakamtan ng 54-anyos na magsasaka ang bunga ng kanyang paghihirap sa inaning pananim matapos itong pagbabarilin hanggang sa mapatay ng riding-in-tandem assassins habang nagbibilad ng palay sa Barangay Alibadabad, bayan ng San Mariano, Isabela kamakalawa. Sa police report na nakarating kay P/Senior Insp. Bonifacio Gannaban, hepe ng San Mariano PNP, nahaluan ng dugo ng biktimang si Lorenzo Barbon ang ibinilad na palay matapos ratratin ng tandem gunmen. Pinaniniwalaang matagal nang atraso at alitan sa lupa ang isa sa motibo ng gunman kaya pinatahimik ang biktima. Matatandaan na naunang niratrat at napatay ng di-kilalang lalaki ang hepe ng Cafgu na si Sgt. Roy Gapay habang ito ay nakikipag-inuman sa pagdaraos ng kapistahan sa Barangay San Jose.