Bus vs motorbike: 2 guro utas
LEGAZPI CITY, Albay, Philippines - Dalawang guro sa elementarya ang magkasabay na sinalubong ni kamatayan habang malubha naman ang mister ng isa sa mga guro makaraang salpukin ng pampasaherong bus ang motorsiklo ng mga ito sa kahabaan ng Maharlika Highway sa bayan ng Del Gallego Camarines Sur kamakalawa ng gabi.
Nakilala ang mga namatay na sina Maurine Buendia, 24; at Melissa Montemayor, 30, kapwa mga guro sa Palanas Elementary School habang kritikal naman ang mister ni Maurine na si Michael Buendia, 25, pawang nakatira sa nasabing bayan.
Sa inisyal na ulat ng pulisya, papauwi na ang mga biktimang magkakaangkas sa motorsiklong minamaneho ni Michael mula commencement exercise sa nasabing school nang masalpok ang bus na minamaneho ni Anturo Cilot mula sa Maynila.
Tumilapon ang mga biktima na hindi na halos makilala dahil sa kalunus-lunos na pagkamatay.
Nabatid na naulila ni Maurine ang limang taong gulang na anak habang naulila naman ni Melissa ang tatlong anak na menor-de-edad
Nasakote naman ang driver ng bus kung saan nahaharap sa kaukulang kaso.
- Latest
