2 sundalo utas sa mga binatilyong supporters ng BIFF

MANILA Philippines – Namamalengke lamang ang dalawang sundalo ngunit hindi nila alam  na ito na pala ang kanilang katapusan matapos silang barilin nang walang kalaban-laban ng dalawang pinaghihinalaang taga-suporta ng Bangsamoro Islamic Freedom Fighters (BIFF) sa Maguindanao.

Nakilala ang mga biktima na sina  Cpl. Nerger Piñero at Pfc. Jamaneel Bulaybulay ng 37th Infantry Battalion ng Philippine Army.

Ayon kay Senior Inspector Acmad Sarico, hepe ng Buldon municipal police, may binibili lamang ang mga biktima sa palengke nang bigla silang lapitan ng dalawang binatilyo saka pinagbabaril sa ulo.

Bukod sa pagpatay, ninawakan din ng mga suspek ang mga biktima sa pagtangay ng M-16 rifle ni  Piñero.

Sinabi pa ni Sarico na nakilala ng mga testigo ang mga suspek na umano'y mga taga-suporta ng BIFF.

Hanggan ngayon ay tinutugis pa rin ng mga awtoridad ang mga suspek.