Motorbike thief utas sa shootout

NORTH COTABATO, Philippines – Bulagta ang 20-anyos na motorbike thief makaraang makipagbarilan sa mga operatiba ng pulisya sa Barangay Poblacion, bayan ng Pikit, North Cotabato kamakalawa ng hapon. Kinilala ni Task Force Pikit Commander P/Supt. Jordine Maribojo ang napatay na si Muslimen Kutina Kawil ng Barangay Bulol sa nasabing bayan. Batay sa ulat ng pulisya, tinangkang parahin ng mga operatiba ng pulisya sa pangunguna ni P/Insp. Sindato Karim ang nagmomotorsiklong si Kawil pagsapit sa inilatag na checkpoint. Pero sa halip na huminto, pinaharurot nito ang motorsiklong walang plaka sa direksyon ng Barangay Gligli kaya humantong sa habulan hanggang sa sumiklab ang shootout. Narekober ang cal. 45 pistol, mga bala, 2-plastic sachet ng shabu, pinatuyong dahon ng marijuana na nakabalot sa papel, tatlong piraso ng improvised lighter, at ang motorsiklo na pinaniniwalaang nakaw.