Parlor, videoke bar pinasabog
MANILA, Philippines - Tatlo-katao na pinaghihinalaang eksperto sa paggawa ng bomba ang naaresto ng pulisya matapos pasabugin ang massage parlor at videoke bar sa Zamboanga City, Zamboanga del Sur noong Lunes ng gabi.
Isinailalim na sa tactical interrogation ang mga suspek na sina Marcel Jumadil, Jumadan Dassan, at si Alshirif Sabdani.
Sa police report na isinumite kay Zamboanga City PNP director P/Senior Supt. Angelito Casimiro, ang mga suspek ay positibong itinuro ng mga testigo na huling namataang lumayo sa pinasabog na Princess Massage Parlor at videoke bar sa kahabaan ng Tomas Claudio Street.
Nabatid na unang nasakote si Jumadil habang patakas habang ang dalawa naman ay ikinanta nito na magkakasunod na nabitag sa follow-up operation sa Aquino Drive, Sapang Palay, Baliwasan Grande sa nasabing lungsod.
Wala namang naiulat na nasugatan at namatay sa pambobomba bagaman lumikha ito ng matinding tension sa mga kustomer ng establisyemento.
Napag-alamang ang pinasabog na establisyemento ay katabi lamang ng dalawang beses na binomba na Deluxe Massage Parlor and videoke bar noong Nobyembre 9 kung saan nasugatan ang isang bomb expert ng pulisya at isang K-9 unit bomb sniffing dog.
- Latest
