Negosyante dedo sa holdaper

BULACAN, Philippines – Napatay ang 38-anyos na negosyanteng mister habang sugatan naman ang kanyang misis at ang traysikel driver makaraang barilin ng dalawa sa apat na holdaper sa bahagi ng Barangay Guyong, bayan ng Sta. Maria, Bulacan kahapon. Naisugod pa sa Mendoza Hospital subalit namatay din si Rodolfo Tafalla habang ginagamot naman ang kanyang asawa na si Jennifer Tafalla, 34, kapwa nakatira sa Barangay Pulong Buhangin; at ang 50-anyos na traysikel drayber na si Edgar Nacianceno na tinamaan ng ligaw na bala ng baril sa kanang hita. Ayon kay PO3 Joey Cabarles, hinarang at hinoldap ng apat na kalalakihang lulan ng dalawang motorsiklo ang trike ng mag-asawa sa kahabaan ng Sta. Maria-Norzagaray National Road. Tinangkang agawin ng mga holdaper ang bag na naglalaman ng P.3-milyon subalit pumalag ang biktima kaya siya niratrat. Boy Cruz