Magsasaka dinedo sa nawalang manok

QUEZON, Philippines - Nagmistulang kinatay na hayop ang katawan ng 42-anyos na magsasaka makaraang pagsasaksakin ng isang obrero na pinagbintangan nitong nagnakaw ng manok kamakalawa ng gabi sa Sitio Centro, Barangay Bignay 2, bayan ng Sariaya, Quezon. Kinilala ng pulisya ang biktimang si Doming “Bay” Villaver, may-asawa at nakatira sa Barangay Manggalang 1 habang pinaghahanap naman ng pulisya ang suspek na si Jayson Ranela ng Barangay Bignay 2. Sa police report na nakarating kay P/Supt. Eduard Mallo, hepe ng Sariaya PNP, kinompronta ng biktima ang suspek kaugnay sa kanyang alagang sasabunging manok na nawawala. Gayon pa man itinanggi ng suspek ang akusasyong pagnanakaw hanggang sa maganap ang pananaksak sa biktima. Bagama’t sugatan ay nakatakbo palayo ang biktima subalit hinabol siya ng suspek saka muling inundayan ng sunud-sunod na saksak hanggang sa mapatay.