Binata nagpakamatay sa problema

CANDELARIA, Quezon, Philippines – Bunsod ng matinding depresyon, mas pinili ng isang 20-anyos na binata ang magpakamatay sa pamamagitan ng paglaslas sa kanyang leeg at pulso kamakalawa ng gabi sa barangay Sta. Catalina Sur ng bayang ito.

Kinilala ng pulisya ang biktima na si John Edward Dacer, residente ng nasabing barangay.

Sa imbestigasyon ng pulisya, nadiskubreng patay ang biktima dakong alas-7:30 ng gabi nang mapatakan ng dugo nito ang kinakapatid na itinago sa pangalang Lea, 10-taong gulang sa ibabang bahagi ng kanilang bahay.

Nang siyasatin ay natuklasan ang biktima na nakasabit sa kisame at may malaking sugat sa leeg at pulso at nasa tabi nito ang isang patalim na may bahid ng sariwang dugo.

Ayon sa ina ng biktima na si Teodora, maaaring dahil sa matinding depresyon kung kayat ipinasyang tapusin ng biktima ang buhay gayunman ay patuloy pa ang isinasagawang imbes­tigasyon kung may foul play sa insidente.