Trader na transgender kinatay

QUEZON, Philippines - Pinagsasaksak hanggang sa mapatay saka pinagnakawan ang 55-anyos na negosyanteng transgender ng mga di-kilalang lalaki na sinasabing nakainuman nito sa kanyang resto bar sa Barangay Wakas, Tayabas City, Quezon kamakalawa ng gabi. Sa ulat na isinumite kay P/Supt. Hyacinth Caliao, hepe ng Tayabas City PNP, kinilala ang biktima na si Joselito Añonuevo ng Mariano Ponce Street Barangay San Diego Zone 2 at may-ari ng Koozy Resto Bar. Sa imbestigasyon nina SPO1 Joseph Burcelango at PO3 Domingo Rivarez, bandang alas-9:30 ng umaga kahapon ay nadiskubre ng mga opisyal ng barangay ang resto bar na nakabukas ang pintuan kung saan nakita ang bangkay ng biktima sa basement. Nawawala rin ang imported na tablet ng biktima at hindi pa malamang halaga ng pera nito na sinasabing tinangay ng apat na kalalakihang huling nakitang kainuman ng biktima noong Linggo ng gabi.