Lampara sumabog: Totoy todas
SOUTH COTABATO, Philippines - Patay ang 3-anyos na totoy habang nalapnos naman ang katawan ng kanyang ama makaraang sumabog ang lampara na sinalinan ng gas sa kanilang bahay sa Barangay Dinlag, bayan ng Lake Sebu, South Cotabato kamakalawa ng gabi.
Kaagad na namatay ang batang si John Erwin Suyan habang nagtamo naman ng 2nd degree burn ang ama nito na si Edwin Suyan, 29, mga residente sa Sitio Talaytay sa nabanggit na barangay.
Lumilitaw sa imbestigasyon ng pulisya, nilagyan ng gas ng kasambahay ang nakasinding lampara nang bigla itong lumiyab at sumabog sa harapan ng bata.
Kitang-kita ni Edwin na nilamon ng apoy ang damit ng kanyang anak na nagawa pang makatakbo subalit lalo pang lumiyab nang sabuyan ng tubig ng mga nakakita.
Sunog din ang suot na damit ni Edwin na hindi na nagawang makasaklolo sa anak.
Naganap ang insidente habang naghahapunan ang pamilya Suyan at nagkataon na nasa harapan ng lampara ang bata kaya napuruhan ito.
Nagpapagaling na sa South Cotabato Provincial Hospital si Edwin na nasunog ang panga hanggang sa kanyang tiyan.
- Latest
