Pulis niratrat ng tandem, grabe

LUCENA CITY, Quezon, Philippines – Kasalukuyang nakikipaglaban kay kamatayan ang beteranong pulis matapos itong pagbabarilin ng mga di-kilalang lalaki na lulan ng motorsiklo sa tindahan ng manok sa Barangay Market View, Lucena City, Quezon kahapon ng madaling araw. Nagtamo ng mga tama ng bala sa katawan at mukha ang biktimang si SP02 Ruelito Roxas, nakatalaga sa PNP Regional Office 4A  sa Canlubang City, Laguna at nakatira sa nasabing barangay. Batay sa inisyal na ulat nina PO3 Nestor Lumanglas Jr, PO3 Michael Subieto, at PO2 Abraham Ardiente, nasa loob ng kaniyang tindahan ng manok ang biktima nang pumasok ang dalawang di-kilalang lalaki at nagtanong ng presyo ng manok. Makalipas ang ilang minuto ay niratrat ang biktima saka mabilis na tumakas ang gunmen lulan ng motorsiklo. Nakarekober sa crime scene ang 11-basyo ng cal. 45 pistol habang patuloy ang imbestigasyon.