Bus salpok sa kotse: 1 dedo
Cavite, Philippines - Isa ang kumpirmadong patay habang ilang mga pasahero ang sugatan matapos ang salpukan ng isang pampasaherong bus at isang kotse habang bumabagtas sa kahabaan ng Aguinaldo highway sa Brgy. Sampaloc 2, Dasmariñas City, Cavite kamakalawa.
Idineklarang dead-on-arrival sa pagamutan ang driver ng kotseng Toyota Corolla na si Rizaldo Montoya, 53, ng Sikap Ville, Brgy. Sabutan, Silang, Cavite dahil sa matinding pagkadurog at sugat na inabot sa katawan.
Kasalukuyan namang nakakulong sa himpilan ng pulisya ang driver ng bus na si Arnulfo G. Sidigo, 39, ng Blk 7, Lot 4 Yellowbell St., Perpetual Vill. 7, Brgy.Mambog, Bacoor Cavite, habang ginagamot sa magkakahiwalay na pagamutan ang mga pasahero ng bus na hindi binanggit ang mga pangalan.
Sa imbestigasyon ni PO2 Ronald Manaig, may hawak ng kaso alas-7:30 ng umaga habang bumabagtas ang bus na may plakang UVE-717 na minamaneho ni Sidigo sa nasabing lugar at patungo ng north direction sakay ang kanyang mga pasahero, habang patungong south direction ang kotse (TJS-880) na minamaneho ng biktima.
Napag-alaman na sinakop umano ng biktima ang kabilang bahagi ng kalsada sa ‘di malamang dahilan kung kaya hindi na nakaiwas ang paparating na bus at tuluyang sumalpok sa sasakyan ng biktima.
Sa lakas ng pagkakabangga, paikot na nagpagulong-gulong ang kotse ng may ilang metro ang layo at naipit sa loob ang biktima. Nahirapan pa ang pulisya na alisin ang biktima sa loob ng nagkayupi-yupi niyang sasakyan bago naitakbo sa pagamutan.
Nahaharap sa kasong Reckless imprudence resulting in homicide and multiple physical injuries and damage to property ang nasabing driver ng bus.
- Latest
