Cotabato kidnap-for-ransom king timbog

MANILA, Philippines – Nasakote na ng mga awtoridad ang hinihinalang pinuno ng kilabot na kidnap-for-ransom group sa lungsod ng Cotabato.

Pinangalanan ni Chief Superintendent Lester Camba, Police Regional Office 12 director, ang suspek na si Khadaffy Guiamelon na nahaharap sa dalawang kaso ng kidnapping.

Nadakip si Guiamelon sa kanyang bahay sa kalye ng Pansacala, Barangay Rosario Heights 10 kahapon.

Nagsanib puwersa ang Anti-Kidnapping Group, Special Action Force, Koronadal City Police Station, South Cotabato Police Provincial Office at Cotabatao City Police Office upang madakip ang suspek.

Dalawang arrest warrant ang inilabas ng Branch 14 at 15 ng Cotabato City Regional Trial Court laban kay Guiamelon.

Samantala, sa grupo rin ni Guiamelon itinuturo ang panloloob sa Agencia Brillantes Pawnshop sa lungsod ng Koronadal nitong Setyembre 18, kung saan dalawang security guards ang nasawi, habang apat ang sugatan.

Kasalukuyang nakakulong sa Cotabato City police si Guiamelon.